Mae Cwmni Da wedi’i enwi yn un o 13 cwmni cynhyrchu annibynnol a ddewiswyd ar gyfer ei charfan Content Futures 2026, yn dilyn lansiad y rhaglen yn Llundain. Bydd y rhaglen newydd sbon yn nodi datblygiad mawr o fenter gefnogi hirsefydlog Indielab i gryfhau’r sector yn y DU, ac mae wedi’i dylunio i gynnig cyfleoedd sut i wynebu amgylchedd marchnad newydd.
Mae’r rhaglen dros dri mis yn dod â charfan o gynhyrchwyr annibynnol sefydledig at ei gilydd ar adeg dyngedfennol i sector sgrin y DU, gan eu cefnogi i fireinio strategaeth, nodi cyfleoedd masnachol newydd a gwneud penderfyniadau hyderus mewn marchnad sy’n newid yn strwythurol.
Dywedodd Prif Weithredwr Cwmni Da, Bethan Griffiths: “Rydym yn falch iawn i gyrraedd carfan Indielabs eleni. Mae’r sector yn wynebu heriau gwirioneddol, ond lle mae her, mae cyfle – ac mae Cwmni Da yn barod i’w fachu. Rydym yn ymrwymedig i esblygu’r ffordd rydym yn gweithio, cryfhau ein partneriaethau presennol, a llunio’r hyn sydd i ddod yn y farchnad newydd hon.”
Ychwanegodd Olivia Simove, Cyfarwyddwr Cynnwys Cwmni Da; “Mae hwn yn gyfle mor amserol i ddysgu gan y goreuon yn y busnes. Mae’r panelwyr a’r siaradwyr y mae Indielabs yn eu cynnig, ynghyd â gweddill y cwmniau sydd yn y garfan yn wych ac yn cynnig cyfleodd euraidd. Mewn diwydiant sy’n aml yn gallu teimlo’n unig ac yn gystadleuol, mae cwmnïau ein carfan ni yn gynnes, agored ac yn awyddus i fod o gymorth i’w gilydd mewn ffordd sy’n wirioneddol adnewyddol.”
Mae carfan 2026 yn cynnwys:
Cwmni Da, 14th Floor Productions, Beezr, Chalk Productions, Freedom Scripted, Happenstance Films, Hello Dolly, Raucous Pictures, Renaissance Studios, Saffron Cherry Productions, Telltale, Unified Productions a Vibrant Television.
Dywedodd Victoria Powell, Sylfaenydd a Phrif Weithredwr Indielab:
“Mae’r farchnad wedi newid — nid dros dro, ond yn strwythurol. Yr hyn rydym yn ei weld gyda charfan eleni yw grŵp o gwmnïau cryf, sefydledig sy’n ailasesu sut maent yn gweithredu, ble maent yn canolbwyntio a sut maent yn creu gwerth. Mae Content Futures wedi’i gynllunio i roi’r gofod, y mewnwelediad a’r fframweithiau iddynt wneud y penderfyniadau hynny gydag eglurder a hyder. Mae’r heriau sy’n wynebu’r sector yn real — ond felly hefyd y cyfle. Y cwmnïau a fydd yn llwyddo yw’r rhai sy’n glir am bwy ydynt, pwy yw eu cynulleidfa, a sut maent yn parhau i dyfu, cyrraedd a’u plesio. Mae Content Futures yn ymwneud â helpu y garfan i wneud y penderfyniadau hynny gyda hyder.”
