Mae Llion Iwan yn gadael Cwmni Da heddiw ar ôl 6 mlynedd gyda’r cwmni, i gychwyn rôl newydd gydag S4C. Mae Cwmni Da yn anfon ein diolch mawr i Llion am ei gyfraniad gwerthfawr fel Rheolwr Gyfarwyddwr a chyn hynny fel Cyfarwyddwr Cynnwys ers 2019. Roedd Llion yn allweddol i lwyddiant y cwmni yn ystod y cyfnod hwn, yn denu comisiynau o bob fath gan sawl darlledwr, ac yn gyrru dri cyd-cynhyrchiad rhyngwladol. O dan ei arweiniad, mae Cwmni Da wedi mynd o nerth i nerth, ac mae’n gadael y cwmni mewn sefyllfa o gryfder .
Talodd Bwrdd Cwmni Da deyrnged i Llion mewn llythyr o ddiolch cafodd ei rhannu gyda’r gweithlu gan un o’r cyfawyddwyr, Phil Williams: “Mae Llion wedi bod yn arweinydd ysbrydoledig, wastad yn barod i feddwl yn greadigol am ffyrdd newydd o weithio ac am lefydd newydd i fynd â Cwmni Da. Mae ei arweiniad a’i syniadau wedi galluogi’r cwmni i ddatblygu i feysydd newydd yng Nghymru ac yn rhyngwladol.“
Mae’r Bwrdd, hefyd yn falch iawn o benodiad Bethan Griffiths yn Rheolwr Gyfarwyddwr dros dro. Roedd Bethan eisiau talu teyrnged i Llion hefyd ar ran y cwmni. “Mae dy arweiniad wedi bod yn allweddol i ni dros y chwe blynedd diwethaf, ac yn enwedig dros cyfnod heriol y pandemig. Rydyn ni, fel cwmni yn anfon ein gwerthfawrogiad, ac ein dymuniadau gorau i ti yn dy rôl newydd. Diolch i ti am y gwaddol wyt wedi’i adael ar dy ôl yma yn Cwmni Da.”
